Молитвы

Тропарь Аркадию Новоторжскому, глас 4:

От духовнаго наставника, отца преподобнаго Ефрема, наставляемь, / послушания добрый рачителю, отче Аркадие, / от мирскаго мятежа удалился еси / и, инок быв изрядный, / добрым подвигом ревнуяй, / от Христа Бога приял еси венец славы Небесныя; / и ныне, вкупе с преподобным отцем Ефремом у Престола Вышняго предстоя, / о нас молися, избавитися нам от всех бед и скорбей // и спастися душам нашим.

Кондак, глас 2:

К глубинам Божественнаго разума вперив ум свой,/ в Небесныя обители востекл еси,/ и равноангельно житие, отче Аркадие, на земли пожил еси,/ и во всем повинулся еси духовному своему настоятелю и наставнику,/ преподобному отцу Ефрему,/ и ныне, вкупе предстояще у Престола Владыки Христа, // молися непрестанно о всех нас.

Молитва
Пред ракой честных мощей глаголемая, в день памяти преподобнаго 13 декабря и 14 августа.

О преславный угодниче Христов и предивный чудотворче, преподобне отче наш Аркадие. В великоименитый и всепразднственный день священныя и светлыя памяти твоея к раце мощей твоих смиренно притекаем, твоея помощи и заступления просяще: не забуди нас благоприятными твоими молитвами и милостивным ходатайством у престола Вседержителева, ид еже ты ныне, радуяся, со ангельскими лики и всеми святыми достойно предстоиши и зриши вся беды и нужды наша. Призри милостивно на нас недостойных, со слезами умиления молящихся ти, и по данней ти благодати болящия исцели, плачущим даждь о Господе радование, печальныя утеши, скорбным отраду пошли, родителям даждь послушливыя и богобоязненныя чада, супругам любовь и согласие, враждующим умиротворение, яко да твоею помощию и предстательством посрамятся вси являющий нам злая и делающия нам пакостная. Поминай нас, отче блаженнейший, в скорбех и бедах мнозех сущих; се бо врази видимии и невидимый объяша нас, междоусобныя распри, глад и пагубы умножишася до зела. Вемы бо, яко достойная по делом нашим восприихом и аки раби лукавии и ленивии вся злая терпим; вемы убо, яко вся напасти сия послании нам суть от Всемилостиваго Бога, не хотящаго смерти грешников, но еже обратится и живым быта им, да многотрудное поприще маловременнаго сего жития прешедше и сими скорбми в покаянии души своя очистивше, вечныя казни, грешником уготованныя, избежим и живот вечный наследуем во Царствии Христа Бога нашего, емуже подобает всякое поклонение и слава, честь и держава со безначальным его Отцем и Пресвятым и Благим и Животворящим Его Духом ныне и присно и во веки веков. Аминь.

Молитва

Небеснаго вертограда Христова юная лозо, Церкве  православныя похвало превознесенная, града и обители нашея крепкое забрало и утверждение, всех с верою и любовию притекающих к тебе, тихое отрадо и утешение, преподобне и богоносе отче наш Аркадие. Во дни тяжких зол, обышедших страну нашу, к тебе, яко молитвеннику благодатному и скорому помощнику, усердно прибегаем и умильно просим тя: пролей теплое твое ходатайство ко Всемилостивому Спасу, да милостив будет к неправдам нашим, да утвердит миром и любовию страну нашу, град сей, обитель сию и вся грады и веси наши от всякого злаго обстояния, от глада и пагубы, и междоусобныя свари добре да сохранит: Церковь же свою святую да избавит от лютаго гонения, от смертоносныя и душегубительныя язвы неверия, да укрепит и возрастит ю: всех же нас от обидящих и ненавидящих да свободит и вся полезная к временному житию и спасению вечному да дарует твоим предстательством и заступлением, да тако прославится тобою пречестное и великолепое имя святыя Троицы, Отца и Сына и Святаго Духа, во веки веков. Аминь.